Bèste sjöttersvrûndj,

Leuk ôm te hwuère dat-ste intresse hôbs in ôzze sjötterie. Weer zin de jôngste sjötterie van Limburg en altied op zeuk nao luuj die ôs ein werrem hart toedrage en ôzze gezamelikke intresse deile.

Weer kômme waekeliks bie-ein en oefene gedurende ’t boete-seizoen, dat lôpt van

1 april tot 1 oktwaober, eedere zaoterdig vanaaf 18.00 oer op ôzze sjöttewei aan de Waert. Kôm gerôs èns langs en ônger ’t genot van ein pilkske of get anges kèn-ste

mit geneete van al ’t gooije dat ôs sjötterie te beeje haet. In de wèntjer sjeete weer trouwens bènne in ôs sjöttelokaal. Weer môtte tenslotte ôs sjeet-kunste op peil weite te hauwte of te verbaetere.

Lid waere kèn-ste al vanaaf 25 euro per jaor. Dan steun-ste ôs finansjeel en hauwte weer dich op de hwuègte van al ôs activiteite en ôntwikkelinge bènne ôs vereiniging. Auch weur-ste oetgenwuédigt veur allerlei evenemente zwao es ôzze jaorlikse fièsaovend, de koffie-taofel van ôs Petrwôonsfiès. ’t Gezellige drie-tal sjeete en nog veul miè.

Es-te ech actief aan alles wils mit doon, dan kènt dat al veur 40 euro per jaor. Dan krieg-ste auch zwao-ein sjiek pak aangemaete en maog-ste mit ôs mit marchere op de fièste wôo weer nao toe gaon, dus auch nao ’t OLS. Mèr zeker auch in ôs eige dörpke zeen weer actief ônger angere bie de Dodenherdenking wat de luuj altied enorm aansprûk en nog veul miè.

Kèn-ste trômmele of höb-ste ambities in die richting, dan is ôzze drûmbènd mesjien get veur dich. Van jônk tot auwt oefene ze same ôm de sjwaon-ste marsje te spele.

Hôb-ste intresse? Loup dan ‘ns bènne in ôs sjöttelokaal aan de Waert op zaoterdig aovend of mail ‘ns mit eine van ôs bestuursleeje, te weite Jo Driessen of Har Lemmens.

Vriewillg maog g’r van ôzze penningmeister natuurlik auch altied ein biedrage euvermake op ôs raekening bie de Rabobank op: NL31 RABO 0149 2485 47 t.n.v. Stadssjötterie Sint Leendert Uermend. Alvas bedank.

Dus loup dus gerös ‘ns bènne of bel mit eine van die bestuursleeje. Houpelik gauw tot ziens op de sjeetwei.

Besjtuur en leeje van Stadssjötterie Sint Leendert Uermend.